ગુજરાત વિધાનસભાની ચૂંટણીમાં ભાજપને જંગી જીત મળી છે. ભાજપ આ મોટી જીતની ઉજવણી કરી રહી છે. ભુપેન્દ્ર પટેલ સોમવારે મુખ્યમંત્રી પદના શપથ લેવા તૈયાર છે પરંતુ બધુ બરાબર પણ નથી. ભાજપને આ ખુશી વચ્ચે પણ દુવિધાનો સામનો કરવો પડી રહ્યો છે. તમામ ક્ષેત્રોમાં વ્યાપક જીત મેળવ્યા બાદ અને સમાજના અગ્રણી વર્ગોને સાથે લઈને સરકાર રચવાનો મોટો પડકાર છે. જ્યારે નવી સરકાર શપથ લેશે ત્યારે પોર્ટફોલિયોની ફાળવણી કરતી વખતે એક સારું સંતુલન જાળવવું પડશે. દરમિયાન ગુજરાતમાં વિધાનસભા પક્ષની બેઠક બાદ ભૂપેન્દ્ર પટેલ અને પ્રદેશ પ્રમુખ સી.આર.પાટીલ દિલ્હી પહોંચશે. દિલ્હીમાં વડાપ્રધાન નરેન્દ્ર મોદી અને કેન્દ્રીય ગૃહમંત્રી અમિત શાહ સાથે મુલાકાત થશે. અહીં કેબિનેટ પર મહોર લાગશે.
કેબિનેટમાં ગૃહના કુલ 182 સભ્યોમાંથી માત્ર 15% જ હોઈ શકે છે. આ માટે મુખ્યમંત્રી સહિત 27થી વધુ સભ્યોને તેમાં સામેલ કરી શકાશે નહીં. સૂત્રોના જણાવ્યા અનુસાર, નવી કેબિનેટમાં પ્રથમ વખતના ધારાસભ્યો, ભુપેન્દ્ર પટેલ અને વિજય રૂપાણીની આગેવાની હેઠળની અગાઉની સરકારોમાં મંત્રીઓનું મિશ્રણ હશે.
પાટીદારો, ઓબીસી અને દલિતો પર ફોકસ
ભાજપના એક નેતાએ કહ્યું કે નવા મંત્રીમંડળની રચના એ ધ્યાનમાં રાખીને કરવામાં આવશે કે તેમાં ચારેય પ્રદેશોનું પ્રતિનિધિત્વ હશે. સમાજના મુખ્ય વર્ગો જેમ કે પાટીદારો, ઓબીસી, દલિત, મહિલાઓ વગેરેને નવી સરકારમાં પ્રતિનિધિત્વ આપવામાં આવશે.
ગત સરકારના આ મંત્રીઓ સંભવિત યાદીમાં
સીએમ પદના શપથ લેનાર ભૂપેન્દ્ર પટેલ ઉપરાંત હર્ષ સંઘવી, જીતુ વાઘાણી, ઋષિકેશ પટેલ, કનુ દેસાઈ, રાઘવજી પટેલ, પૂર્ણેશ મોદી, જગદીશ વિશ્વકર્મા, મનીષા વકીલ, જીતુ ચૌધરી જેઓ અગાઉની સરકારમાં મંત્રી રહી ચૂક્યા છે તેઓ પણ આ સરકારમાં સામેલ થાય તેવી શક્યતા છે. વિજય રૂપાણી કેબિનેટના કેટલાક મંત્રીઓ જેવા કે કુંવરજી બાવળિયા, જયેશ રાદડિયા, ગણપત વસાવા, પુરુષોત્તમ સોલંકી, કુમાર કાનાણી, શંભુજી ટુંડિયા, મુળુ બેરા અને અન્યોના નામ પણ ભાજપના વર્તુળોમાં ચર્ચામાં છે.
નવા ચહેરાઓને પણ તક મળશે
સૂત્રોએ જણાવ્યું કે પ્રમુખ પદ માટે સંભવિત નામ તરીકે દલિત નેતા રમણ વોરાની ચર્ચા થઈ રહી છે. સૂત્રોએ જણાવ્યું કે ઓબીસી નેતાઓ શંકર ચૌધરી અને અલ્પેશ ઠાકોરના નામ પણ મંત્રીપદ માટે શક્ય છે. અન્ય લોકોના નામ પણ છે જેઓ પહેલા મંત્રી નથી રહ્યા. આ વખતે શપથ લેનારાઓમાં રિવાબા જાડેજા, અમિત ઠાકર, બળવંતસિંહ રાજપૂત, ભીખુસિંહ પરમાર, કાંતિલાલ અમૃતિયા, મુલુ બેરા, કૌશિક વેકરિયા, પીસી બરંડા અને દર્શના દેશમુખનો સમાવેશ થાય છે.